RAPORT NGA TAKIMI REGJIONAL NE MANASTIR NE MES RRJETIT TE AMBASADOREVE TE MJEDISIT PER KOSOVE DHE MAQEDONI

Organizuar nga Rrjeti i Ambasadorëve të Mjedisit për Maqedoni dhe Rrjeti i Ambasadorëve të Mjedisit për Kosovë, si pjesë e Lëvizjes Ballkanike BELLS, me datë 7 nëntor në Manastir të Maqedonisë u organizua konferenca e parë rajonale me temë: “Standardet Evropiane dhe Rajonale në lidhje me termocentralet me djegie të ngurta”.

z. Kushtrim Kaloshi, Drejtori Ekzekutiv i ATRC-se
gjate takimit ne Manastir

Qëllimi kryesor i konferencës ishte krijimi i urave të komunikimit në mes Komunës së Manastirit dhe Komunës së Obiliqit, shkëmbimi i përvojave dhe dyfishimi i praktikave të mira dhe pozitive të implementuara në shtetet respektive, kur kihet parasysh fakti se edhe në Komunën e Manastirit edhe atë të Obiliqit janë te ndërtuara dhe funksionale Termocentrale me djegie të ngurta.

Delegacioni i Kosovës, në përbërje të Kryetarit të Komunës së Obiliqit, sekretarit permanent të Ministrisë së Mjedisit, Deputet nga Kuvendi i Kosovës, shefit të Agjencionit për Mbrojtje të Mjedisit, zyrtarin e lartë të departamentit të Mjedisit pranë Ministrisë së Energjisë,  gazetarë, anëtarë të Rrjetit të Ambasadorëve të Mjedisit për Kosovë, ATRC etj, u pritën në një takim të veçantë nga Kryetari i Komunës së Novacit (komunë e re e krijuar pas decentralizimit, në të cilën komunë tash gjendet termocentrali REC-Bitola). Dy delegacionet analizuan në hollësi gjendjen mjedisore në dy komunat respektive, nivelin e ndotjes së mjedisit, si dhe masat që janë marrë nga komuna dhe shteti për elimininim e pasojave nga ndotja.

Ne pjesën e dytë të agjendës, në një takim punë, bashkërisht të dy delegacionet në përbërje të njëjtë: deputetë, përfaqësues të Ministrive të Mjedisit, shoqëri civile, media etj, diskutuan rreth gjendjes së përgjithshme mjedisore në Obiliq dhe Manastir, duke u përqendruar më shumë në gjetjen e zgjidhjeve për uljen e nivelit të pluhurit dhe përmirësimin e jetës së qytetarëve të cilët jetojnë në dy komunat e përmendura.

Rekomandimet e diskutuara ne konference:

1. Shtete e rajonit të punojnë më ngushtë me qytetarët në krijimin e politikave të reja energjetike bazuar në Standarde Evropiane.
2. Rritja e kapaciteteve prodhuese energjetike të bëhet duke hulumtuar alternativa tjera të prodhimit të energjisë me erë, ujë, gaz etj,
3. Qeveritë respektive të shtojnë fondet për nismat dhe propozimet e shoqërisë civile të orientuara në përmirësimin e gjendjes në mjedis,
4. Investimet në fushën e mjedisit të përcillen me një proces transparent dhe gjithëpërfshirës, duke siguruar pjesëmarrje te palëve te interesit dhe qytetarëve të thjeshtë pjesë në vendimmarrje.